Presidenti i Republikës së Kosovës, Hashim Thaçi vazhdon të këmbëngul në idenë e bashkimit të Luginës së Preshevës me Kosovën, raporton arbresh.info.

Thaçi përmes postimit të tij në Facebook ka shkruar se humbja eventuale e kësaj mundësie, do të jetë gabim historik i pariparueshëm.

“Vazhdoj të besoj fuqishëm se Lugina e Preshevës duhet t’i bashkohet Kosovës dhe për arritjen e këtij qëllimi ne duhet të jemi të bashkuar. Humbja eventuale e kësaj mundësie, do të jetë gabim historik i pariparueshëm”, është shprehur Thaçi.

E drejta e përfshirjes së Preshevës, Bujanocit dhe Medvegjës me Republikën e Kosovës sipas tij, është legjitime, korrigjim i padrejtësive historike dhe siguri për qytetarët e asaj treve për të jetuar në trojet e tyre.

“Kjo përpjekje ka ndalur së realizuari angazhimet e sofistikuara që veriu i Kosovës t’i dorëzohet Milan Radojçiqit, fillimisht pasuria e Trepçës, për të vazhduar me transformimin e pasurive shtetërore në ato komunale (katër komunat e veriut) dhe, po ashtu, ka parandaluar planet për sovranitet të dyfishtë dhe asociacion me mandat ekzekutiv, modeli i Republikës Serbe, pra autonomi rajonale”, ka shkruar presidenti Thaçi./Arbresh.info